memories d'un ferreteru

pel momentu y hasta nuevu avisu memories d'un ferreteru nun se va actualizar. sicasí en cualesquier instante podría introducise una nueva entrada. pa tar informáu/ada suscríbete al rss del blog.
gracies.
pues siguir los comentarios de xabel en www.xabeldiz.blogspot.com

quincuaxésimu quintu día

0646 sonó'l primer despertador, prendió la radio, y como siempres llegó a llevantase pensando si la radio ya tuviera encesa cuando despertara.

0705 llegó al bañu coles narices taponaes, taba con entamos de catarru (anque nun ye entamu sinon que son los soletazos d'aquel primer catarru que tuviere cuando yera neñu); sonóse y aclarió la cara.
0725 la so madre llegó a dicí-y que punsiera ropa d'agua, taba lloviendo, elli garró'l movil y llamó a un compañeru pa que lu llevare.
0751 en coche llegó a la ferretería. llovía...
0800 entamó a aspirar. nun dexaba de parase la máquina d'aspirar, aun asina pasóla per tola tienda. depués llegó-y'l turnu a la máquina de llavar, ésta sí que se paró depués d'una selmana ensin carga por motivos técnicos.
0900 yá sabéis revisar y revisar...
1300 salgo pa xintar.
1500 vuelvo. sacó los palés y tomó un café con lleche y bien de sucre, anque tamién ye a tomalu ensin gota sucre.
1700 pasa la tarde ensin novedá.
1910 tien de dir a la oficina.
1912 firma'l finiquito. ta dalcuerdu.
1915 entama a despedise.
1930 marcha.
1935 unes cerveces colos compañeros.
2000 alcuérdase de maria antonieta. qué va ser d'ella cuando tea en madrid?

fin de la primer etapa de memories d'un ferreteru. agora vuélvese a la, mal llamada, normalidá llaboral de la mocedá asturiana.
mañana entama otru día, otru ciclu... día d'asturies del festival de cine de xixón, diré... escuela de seronda, diré... serviciu públicu d'emplegu, diré... carné de conducir, sacarélu... maria antonieta, marchará... y yo nun quiero, nun puedo, marchar.

por qué tenemos que perder la inocencia?

despedíu por fin de contratu

esti miércoles el ferreteru conoció mediante carta l'anunciu de la non renovación del so contratu y perende la finalización de la inconstitucional relación laboral mantenida con una ferretería del centru d'asturies. la nueva, inesperada anque previsible, pon en peligru la meyoría física d'el ferreteru colos sos catorce quilos, sí catorce, perdíos nestos seis meses de trabayu.

como ye persabío nestos seis meses nun hebo vacaciones y agora quiseron dámiles, pa nun tener que les pagar, a lo que la rempuesta foi que sintiéndolo muncho y al nun conocer colos llegales dos meses d'avisu nun podía coyer les vacaciones ufiertaes.
ábrense agora nueves puertes pal ferreteru... dir al festival de cine de xixón, dir a la escuela de seronda, dir a la fiesta de santolaya en puertas, dir a los ciclos de la caxa... sacar la llicencia de conducción p'asina dexar de ser tan diferente respectu al restu de persones...
en fin que la mayor sorpresa vieno cuando-y dixeron al ferreteru que trabayaba mui bien pero que nun encaxaba na empresa, y eso que grande la empresa yera enforma... nun m'apena ellos lo pierden, voi echar en falta a dalgún compañeru pero tampoco tamos tan lloñe como pa nun mos poder ver.
y lo meyor de too ye que si me dicen que siga yo hasta sigo con ellos. ah y les circunstancies que provocaron la mio contratación siguen idéntiques a como taben cuando llegué.

salú

carta d'axuste

un viaxe del ferreteru

el ferreteru ye quiciaves una de les persones mas vagues a la hora de viaxar, baste conocer qu'anque-y preste pela vida dir a cabrales o a xixón nun va por nun tar una hora nel bus, poro les sos salides del centru asturianu son rares y escases. esta fin de selmana, y ante'l convite de corrupia de dir a la fiesta del oruxo de potés (provincia de santander), decidió cambiar los vezos y per primera vegada n'años salir d'asturies y conocer (reconocer) otros llugares y cultures, amás de por supuestu ver la cara más oriental de los picos...

entamó'l día nuna asamblea del conseyu de la mocedá del principáu d'asturies onde una de les persones más queríes y apreciaes pol ferreteru diba dexar la llábana qu'arrastraba dende había cuatro años a otra de les persones a les que más quier. depués de la xinta l'electropedagogu vieno pol ferreteru a metelu en coche con dirección la liébana... nun hebo resistencia.
namás llegar sintióse como en casa, sonáben gaites asturianes, incluso creyó tar nel occidente asturianu, cuando en realidá taba nel occidente de la provincia de santander, de la que sintía la rumba d'ibias; caminando peles perguapes caleyes empedraes de piedra asistía a un modelu de recuperación urbanística que n'asturies, y perespecialmente na zona oriental, ye cuasi desconocíu. bien llueu atopamos a xente cabraliego que mos diba amenizar la nueche con pergupes conversaciones sobre l'orixé orxenomescu de los pueblos de cabrales y de la liébana d'au radicarí la enorme semeyanza llingüísitica de los conceyos... a tal grau llegó que na visita al muséu de los picos d'europa de potés llegó cuasi a tener un orgasmu filolóxicu al sintir l'aspiración perfecta de la h aspirada que dexó impresionaos a corrupia y electro.
reconozo que siento almiración polos pueblos de liébana, sobre manera por como son a salir y desenvolver el so futuru, un exemplu a siguir polos pueblos del oriente d'asturies. ta mui guapo tener el picu urriellu, pero ensin cultura propia ye como tener un naranxu en metá del árticu, una curiosidá ente milenta que con una güeyada ta vista y pervista.
a la mañana, creo que la crítica culinaria la va facer electropedagogo, llevantámonos y depués de despedinos del nuesu anfitrión, hai families que tienen la suerte de tener un encantu perespecial pa bien, fuimos a regala-y una corbata al nuesu queríu amigu estoupo que bien la merez.
el ferreteru dexó atrás la so caxina de regaliz, aquella tan guapa, pero cola seguranza de que va facese un bon usu de la mesma.
hai una cosa que me llama l'atención d'esta zona, mientres n'asturies el gobiernu asturianu rechaza la cultura asturiana en cantabria la cultura asturiana ye asumida como propia ensin nengún rubor, musicalmente falando, que coses... y diz areces qu'asturies nun tien falta redifinir la so identidá.
dientro d'unos años cuando vuelva salir d'asturies volverá otra entrada sobre viaxes. anque la verdá ye que me paez que nun pusi demasiao de los viaxes. corrupia conduz mui bien y nun pasó'l los llímites en nengún momentu.
besos y abrazos.

por ciertu mañana voi saber si me renueven el contratu.

embaxo los adoquines nun hai sable

francia ta en pie de revolución, como doscientos años enantes y nel 68, les cais de la república exemplar enllénense de movilizaciones sociales, los y les que nun tienen quieren tener, los y les que nun pueden quieren poder, quieren vivir como los y les demás. la modélica convivencia de la sociedá francesa fenció hai dos selmanes cola muerte de d'un mozu, perseguíu pola policía, electrocutáu por unos cables d'un de los barrios de la miseria de la ciudá del amor.

esi momentu significó l'entamu d'una riestra movilizaciones que van espardiéndose yá nun solo peles ciudaes franceses sinon tamién a los países de la rodiada con altu porcentaxe de población inmigrante. europa nun ta preparada, europa nun lo esperaba, el nuesu sistema nun reacciona lo rápido que debiera...
embaxo los adoquines nun hai sable, nun hai poesía, hai supervivencia. nun hai lírica porque nun hai educación, nun hai lírica porque nun hai trabayu, nun hai lírica porque nun hai participación nos elementos estatales de consulta ciudadana, nun hai participación porque nun esisten, nun son.
y sí son y tan faciendo lo que pueden pa que se sepan que son, pa que se sepa que quieren vivir en condiciones dignes, que tan fartos y fartes de vivir en edificios en ruines, que tan fartos de nun poder estudiar porque tienen que buscase la vida pa comer, que tan fartos de ser discriminaos por nun ser fios y fies de franceses o europeos...
hai unos años un collaciu, maliq, toulousan (pémeque escríbese asina) y fíu d'arxelinos, cuntábame qu'elli nun podía entrar en discotéques, porque nun lu dexaben; yo miraba pa elli y non lo creia, quiciabes fuera la mio primer decepeción con francia, nun sé, pero aquella discriminación estulta y contraria a la igualdá paecióme puru y absolutu facismu. maliq ye un tio absolutamente normal, nun tien más elementos en común colos que tan anguaño movilizaos y movilizaes que ser fiu d'arxelín, la so familia ta integrada na comunidá y vive como cualesquier familia francesa...
esta revolución francesa de güei nun ye nueva na historia siempre los que nada nun tienen llevántanse pa tener y asina sigue'l ciclu de la historia. agora a unos quéda-yos facer real la integración y a otros tócanos preparanos pa integrar a los y les que vayan venir. retos difícles pero que pa un país esportador de mano d'obra, como ye asturies, nun tienen de suponer un handicap, habemos aprovechar la esperiencia de los de nueso allende los mares o allende los pirineos y aplicar les fórmules que permitieron que los y les asturianes del esterior pudieren vivir, y en casos prosperar, nos países d'acoyía.